抑鬱症程度疑問

病患者女 - 38歲

本身我已自覺多年情緒低落，試過唔同原因去自殘同自殺。早前因鄰居關係令我情緒困擾，食唔到又失眠，又有自殘同自殺諗法，好唔想住响度，於是睇政府門診寫左轉介信比我，去左政府精神科診所做評估，之後比左快期我，等左大概2個月就有得睇。

第一次見醫生時，並冇比問卷我填了解我情況，過程中問鄰居點困擾我，亦答佢我冇咩胃口但因為要返pt所以lunch都食個包，夜晚迫自己食d野; 同興趣方面我冇以前咁enjoy煲劇，集中唔到精神; 夜晚失眠，半夜醒左訓唔到，會諗負面野; 自殘我起初用指甲咭自己之後再用cutter介傷自己; 7月試過吊頸自殺，但佢聽到我話太痛放棄左，佢就問跟住呢？我話冇跟住…只係繼續留意自殺新聞，物色下自殺地方。佢又了解下家族精神病背景，童年點就完。過程冇10分鐘。最後只係開左好輕量既抗抑鬱藥，我覺得奇怪，以為自己會好嚴重，畢竟比左快期我睇。

今日再覆診，佢都只係問鄰居仲有冇搔擾我(我話冇但仲係有心理壓力，情緒冇改善，訓唔到)，自理能力(冇咩動力去做家務)，有冇返工，只係話加強劑量比我就完。我問佢我既抑鬱症程度，好驚訝佢答我'算係輕微程度'。佢都冇跟進我自殺同自殘既情況點…

所以我好疑惑究竟呢個醫生用咩去判斷我只係輕微情況? 咁點解當初又會比快期我? 因為我自殺死唔去，決心唔夠強烈所以佢覺得冇大問題? 定覺得鄰居冇再搔擾我，所以我會冇事? 我覺得呢個醫生冇深入了解我情況，幫唔到我，輕視左我個病情。

所以想徵求下呢度既建議，我既情況係咪佢所講既只屬輕微? 用咩去判斷? 究竟佢有冇誤診? 諗緊轉唔轉去睇私家。多謝你既耐心睇完我呢篇長文。